Нарадзіўся Міхал Казімір Радзівіл Рыбанька ў вельмі неспакойны час, 13-га чэрвеня 1702-га года, гэта быў перыяд доўгай 20-гадовай паўночнай вайны. Адразу пасля нараджэння, яго бацькі, Караль Станіслаў Радзівіл і Ганна Сагнушка, выехалі з ім за межы ВКЛ і вярнуліся на радзіму толькі ў 1709 годзе.
Пасля вяртання хлопчыка пачалі навучаць дома, і адным з яго настаўнікаў быў ксёндз Цэзар, пра якога Міхаіл Радзівіл запісаў у сваім дзённіку: «Усё, што сёння ведаю і ўмею, усё ідзе ад яго інструкцый». Свой дзённік Радзівіл Рыбанька вёў на працягу ўсяго жыцця.
Пасля смерці бацькі ў 1719-ым годзе Міхаіл Казімір Радзівіл Рыбанька становіцца адным з найбагацейшых магнатаў у Рэчы Паспалітай. Дзяржаўнай дзейнасцю ён пачаў займацца ў 1720-ым годзе, калі яго ўпершыню выбралі паслом на сойм, і ў далейшым, на гэтую пасаду яго выбіралі пастаянна.
Падарожнічаць па Еўропе Радзівіл пачаў у 1721-ым годзе. Наведаўшы дзясяткі еўрапейскіх гарадоў, да 1722-га года ён апынуўся ў Францыі, а ў кастрычніку 1722-га года прысутнічаў на каранацыі Людовіка XV, з якім у далейшым, не аднойчы, браў удзел у паляванні. У Парыжы ён праслухаў курс па матэматыцы і займаўся ўдасканаленнем коннай язды і мастацтва фехтавання. У наступным 1723 ад германскага імператара ён атрымлівае месца ў імперскім рэйхстагу.
У 1725 годзе Радзівіл Рыбанька ажэніцца з Францішкай Уршуляй Вішнявецкай, таленавітай і высокаадукаванай жанчынай, пад уплывам якой у Нясвіжы быў адкрыты тэатр, аднавілася праца друкарні і папоўнілася замкавая бібліятэка.
Першыя значныя дзяржаўныя пасады, адразу дзве, Рыбанька атрымлівае ў 1728-ым годзе, яго прызначаюць маршалкам трыбунала і канюшым ВКЛ. Побач з дзяржаўнымі справамі Міхась Радзівіл займаецца аднаўленнем Нясвіжа, які падчас вайны быў цалкам разбураны і абязлюдзеў. У выніку, Нясвіж зноў адрадзіўся і пачаў квітнець.
Дзякуючы сваёй дзейнасці і наяўнасці ўласнага войска Міхаіл Казімір Радзівіл паўплываў на абранні караля Рэчы Паспалітай. У 1733 годзе, пасля смерці Аўгуста ІІ, ён выступіў супраць зноў абранага караля Станіслава Ляшчынскага і ўдзельнічаў у арганізацыі новага выбарчага сойму, на якім быў выбраны Аўгуст ІІІ, які падтрымліваўся ім. За гэта ў 1734 годзе Радзівіл атрымаў пасаду маршалка надворнага.
Пасля абрання новага караля Рэчы Паспалітай, у 1734-1735-ым годзе князь Радзівіл, на чале сваёй прыватнай арміі змагаўся на баку Аўгуста ІІІ супраць прыхільнікаў Станіслава Ляшчынскага. Перамога над праціўнікамі паспрыяла атрыманню ім у 1735 годзе новай пасады польнага гетмана ВКЛ, а ў 1744 годзе вялікага гетмана літоўскага. У гэты ж перыяд ён быў прызначаны кашталянам і ваяводам у Троках і Вільні.
Пасля смерці сваёй жонкі Ўршулі ў 1753 годзе, ад якой у яго было тры сыны і чатыры дачкі, ён ажаніўся другі раз у 1754 годзе на ўдаве Ганне Міцэльскай, яна нарадзіла яму сына і трох дачок.
У выніку сваёй актыўнай дзейнасці князь Радзівіл пабудаваў і трымаў шмат мануфактур, сярод якіх былі: у Нясвіжы - суконная, дывановая, у Налібоках - шкляная, у Свержане - фаянсавая, а яшчэ ён заснаваў мануфактуру, дзе праводзіліся знакамітыя Слуцкія паясы. Для фармавання ўласнага войска афіцэрамі, ён утрымоўваў кадэцкі корпус у Нясвіжы.
Міхал Казімір Радзівіл Рыбанька памёр 22 мая 1762 года і быў пахаваны ў радзівілаўскай крыпце.
