Хрыстафор Радзівіл (Малодшы) нарадзіўся 22 сакавіка 1585 года. Паколькі быў ён сынам Хрыстафора Радзівіла Пяруна і ўнукам Мікалая Радзівіла Рудога, няцяжка было прадбачыць шлях, які ён абярэ. Адвучыўшыся ва ўніверсітэтах Лейпцыга і Гайдэльберга, ён, як і яго бацька з дзедам, заняўся ваеннай справай.
Першы баявы досвед Хрыстафор Радзівіл атрымаў у вайне са шведамі ў Лівоніі, ваюючы ў складзе войскаў Яна Карла Хадкевіча. Падчас перамір'я са шведамі, адправіўся на іншую вайну з Масквой, якая доўжылася ў перыяд з 1609 па 1618 год. У 1615 годзе ён быў прызначаны польным гетманам ВКЛ. Пачаў кіраваць невялікімі ваеннымі аперацыямі, ахоўваць мяжу Літвы і на час адсутнасці Вялікага гетмана Літоўскага выконваў ягоныя абавязкі.
Пасля актывізацыі ваенных дзеянняў з боку шведаў, якія пачалі адваёўваць згубленыя ў пачатку вайны тэрыторыі, Хрыстафору Радзівілу прыйшлося вярнуцца ў Лівонію. Там упершыню ў гісторыі войска ВКЛ для ўзмацнення кавалерыі ім былі ўведзены драгуны, якія маглі ваяваць у якасці пяхоты.
У 1621 годзе пад націскам шведаў Радзівіл вымушаны быў адступіць на тэрыторыю Літвы, пакінуўшы Рыгу і Мітаву. Аднак праз год, нягледзячы на тое, што меў меншую колькасць войскаў у параўнанні са шведамі, ён змог адбіць Мітаву і замкі на мяжы з Курляндыяй.
Хрыстафор Радзівіл займаўся і палітычнай дзейнасцю. Ён браў удзел у абранні новага караля Рэчы Паспалітай Уладзіслава IV. Падчас выбараў прывёў з сабой атрад у тысячу жаўнераў для абароны сваіх аднадворцаў пратэстантаў.
Падчас Смаленскай вайны з Масквой з 1632 па 1634 г. Радзівіл вёў ваенныя дзеянні на тэрыторыі Літвы, якую акупавала саракатысячнае маскоўскае войска пад камандаваннем Міхаіла Шэйна. Па загадзе свайго бацькі ён арганізаваў смелы рэйд па маскоўскіх тылах. На працягу васьмі месяцаў дапамагаў Смаленскаму гарнізону ўтрымліваць горад ад маскоўскай аблогі. Арганізоўваў рэйды па ваколіцах Смаленска, пазбягаючы буйных войскаў суперніка. Затым аб'яднаўся з шасцітысячным атрадам Аляксандра Корвін-Гасеўскага. Адпраўляў у Смаленск падмацаванні. Пасля падыходу асноўных войскаў Рэчы Паспалітай на чале з Уладзіславам IV, прыняў удзел у асяроддзі і прыняцці капітуляцыі ад маскоўскіх войскаў, якія стаялі пад Смаленскам.
У чэрвені 1635-га года Хрыстафор Радзівіл удзельнічаў у заключэнні міру паміж Рэччу Паспалітай і Масквой, у тым ліку і яго подпіс стаіць на мірнай дамове. У наступным 1635-ым годзе за свае ваенныя заслугі ён атрымаў пасаду Вялікага Гетмана Літоўскага, Магілёўскую эканомію і Чачэрскае староства.
Разам з ваеннай і палітычнай дзейнасцю Хрыстафор Радзівіл надаваў увазе мецэнацтву, за свае сродкі навучаючы студэнтаў-кальвіністаў з Літвы ва ўніверсітэтах Германіі. Нягледзячы на тое, што быў пратэстантам, маршалкам канвакацыйнага сойму, ён ініцыяваў прыняцце пастановы аб легалізацыі праваслаўнай царквы ў Рэчы Паспалітай.
Ад шлюбу з Ганнай Кішчанкай пакінуў пасля сябе сыноў Мікалая, Стэфана, Ежы і Януша - будучага Вялікага гетмана Літоўскага. Памёр Хрыстафор Радзівіл (Малодшы) у 1640-ым годзе.
